თანამედროვე ელექტრომოწყობილობებისთვის საჭიროა სტაბილური ელექტრომომარაგება, განსაკუთრებით მაშინ, როდესაც საქმე გვაქვს ინდუქციურ დატვირთვებთან. (ძრავები, ტუმბოები, კონდიციონერები, ლიფტები და სხვა.) სწორედ ასეთ შემთხვევებში გამოიყენებენ ტრანსფორმატორიან უწყვეტი კვების წყაროებს, რომელიც არა მხოლოდ უწყვეტ კვებას უზრუნველყოფს, არამედ ტრანსფორმატორის საშუალებით, იცავს მოწყობილობებს უკუდენისა და ელექტრული ხმაურისგან.

რა არის ტრანსფორმატორიანი უწყვეტი კვების წყარო?

ტრანსფორმატორიანი უწყვეტი კვების წყაროები მიეკუთვნებიან On-line ტიპის უწყვეტი კვების წყაროებს და ფუნქციონირებენ ორმაგი გარდაქმნის პრინციპით.

მთავარი განსხვავება, სტანდარტული On-line უწყვეტი კვების წყაროსთან შედარებით, არის ჩაშენებული ტრანსფორმატორის არსებობა ინვერტორსა და მოწყობილობებს (დატვირთვას) შორის, გალვანური იზოლაციისთვის.

რა არის გალვანური იზოლაცია?

გალვანური იზოლაცია ნიშნავს, რომ ტრანსფორმატორის პირველადი(შემავალი) და მეორეული(გამომავალი) ხვიები ერთმანეთთან არ არიან ელექტრულად დაკავშირებული. ელექტრული დენის გადაცემა ხდება მხოლოდ მაგნიტური ველის საშუალებით, შედეგად:

•  მოწყობილობები იზოლირდება შესაძლო ელექტრული ხარვეზებისგან (უკუდენისგან დაცვა).
•  ინდუქციური დატვირთვების არსებობის შემთხვევაში, მნიშვნელოვნად იზრდება სისტემის გამძლეობა.
•  ზუსტი და მგრძნობიარე მოწყობილობები დაცულია ელექტრული ხმაურისგან.

ტრანსფორმატორიანი უწყვეტი კვების წყაროს ძირითადი უპირატესობები:

ინდუქციური დატვირთვების სტაბილურობა

ინდუქციური მოწყობილობები (ძრავები, ტუმბოები, ლიფტები და სხვა) გაშვებისას საჭიროებენ ნორმაზე 10-ჯერ მეტ დენსაც კი. ტრანსფორმატორიანი უწყვეტი კვების წყაროს ტექნიკური მახასიათებლები ამცირებს პიკური დენის ზემოქმედებას და უზრუნველყოფს გაშვების დროს სისტემის სტაბილურ მუშაობას.

დაცვა უკუდენისგან

ქსელის გათიშვის შემდეგ ძრავები აგრძელებენ ინერციით ბრუნვას და გენერატორებად იქცევიან - იწყება დენის უკუსვლა. ტრანსფორმატორი, როგორც გალვანური ბარიერი, იცავს ინვერტორს ამ უკუდენისგან და ზრდის სისტემის საიმედოობას ინდუქციური დატვირთვების გამოყენებისას.

ელექტრული ხმაურისგან დაცვა

ტრანსფორმატორიანი უწყვეტი კვების წყაროები განსაკუთრებით მნიშვნელოვანია იმ გარემოში, სადაც გამოიყენება მაღალი სიზუსტისა და მაღალი მგრძნობელობის ელექტრო მოწყობილობები. ასეთ მოწყობილობებში, ელექტრული სიგნალის მნიშვნელობის მცირე გადახრაც კი შეიძლება გახდეს მონაცემთა დაკარგვის, ფუნქციების შეზღუდვის ან პერმანენტული დაზიანების მიზეზი. მსგავსი დაცვის მექანიზმების არსებობა განსაკუთრებით საჭიროა მაღალი სიზუსტისა და  კრიტიკული დანიშნულების სამედიცინო-დიაგნოსტიკურ აპარატურებში, მაგალითად: MRI, CT, PET სკანერები, რენტგენის მოწყობილობები და სხვა.

ტრანსფორმატორიანი UPS წარმოადგენს ეფექტურ და უსაფრთხო არჩევანს იმ გარემოში, სადაც საჭიროა უწყვეტი ენერგომომარაგება, ინდუქციური დატვირთვების მდგრადი მართვა და მოწყობილობების დაცვა უკუდენისგან, ასევე ფილტრაციული მახასიათებელი ქმნის საიმედო პირობას ძაბვის მიმართ მგრძნობიარე მოწყობილობებისთვის.

პროდუქტის შესაძენად ეწვიეთ ბმულს: https://intellcom.net/ka/catalog/26/On-Line-UPS/features/1161