სიახლეები და მოვლენები

"ინფორმატიკისა და მართვის სისტემების" ფაკულტეტის დღისადმი მიძღვნილი ღონისძიების მსვლელობისას, საქართველოს ტექნიკურ უნივერსიტეტსა და შპს „ინტელკომ ჯგუფს“ შორის ურთიერთთანამშრომლობის მემორანდუმი გაფორმდა.

მემორანდუმს ხელი მოაწერეს ტექნიკური უნივერსიტეტის რექტორმა დავით გურგენიძის და "ინტელკომ ჯგუფის" დირექტორის მოადგილემ ზაზა ძაძამიამ.

თანამშრომლობა მიზნად ისახავს ხელი შეუწყოს "ინფორმატიკის და მართვის სისტემების" და "ენერგეტიკის" ფაკულტეტის სტუდენტებს, აკადემიური უმაღლესი განათლების ფარგლებში პროფესიულ მომზადებაში, როგორც თეორიული სწავლების, ასევე პრაქტიკული საქმიანობის გზით.

მემორანდუმი, წარჩინებული სტუდენტებისათვის მოიცავს შემდეგ ასპექტებს:

• სტაჟირებისა და პრაქტიკის გავლა „ინტელკომ ჯგუფის“ ტექნიკურ განყოფილებაში, შემდგომი დასაქმების პერსპექტივით;
• საერთაშორისო ბრენდების სასწავლო კურსების გავლა და სასერტიფიკატო ტესტების ჩაბარება;
• სტიპენდიის დანიშვნა;
• საგრანტო კონკურსების ჩატარება;

გარდა ამისა, „ინტელკომ ჯგუფი“ ინფორმატიკისა და მართვის სისტემების ლაბორატორიას გადასცემს IT და ენერგო უზრუნველყოფის პროდუქტებს, ასევე, უზრუნველყოფს შესაბამისი სახელმძღვანელოებით და პრაქტიკული ამოცანებით.

„ინტელკომ ჯგუფი“ მზადაა განახორციელოს სხვა ნებისმიერი აქტივობა, რომელიც ხელს შეუწყობს და წაახალისებს სტუდენტებს როგორც თეორიული ცოდნის ამაღლებაში, აგრეთვე პრაქტიკული უნარ-ჩვევების გამომუშავებაში და დასაქმებაში.